“Delegacioni i Xhamisë ‘Drita’ në vizitë zyrtare në Shqipëri për 30-vjetorin: Udhëtim vëllazëror, takime institucionale dhe mirënjohje reciproke.
Miqësia e shëndoshë nuk ka kufij
Vizitë zyrtare e delegacionit të Xhamisë “Drita” në Shqipëri me rastin e 30-vjetorit të themelimit
Me rastin e 30-vjetorit të themelimit, Xhamia “Drita” ka nisur një program të veçantë vizitash në Shqipëri, duke forcuar lidhjet vëllazërore dhe bashkëpunimin me institucionet fetare të vendit. Më 5 dhjetor 2025, një delegacion prej 11 anëtarësh, i kryesuar nga Kryetari Fadil Asani, së bashku me zëvendëskryetarët Mustaf Mustafa dhe Visar Robelli, si dhe anëtarë të komunitetit, udhëtoi drejt Tiranës për një vizitë disa-ditore që përfshin qytetet Tiranë, Shkodër, Krujë dhe Elbasan.
Mirpritje në Tiranë dhe vizita në Xhaminë e Namazgjasë
Pas mbërritjes dhe akomodimit në kryeqytet, delegacioni filloi aktivitetet zyrtare me faljen e namazit të Xhumasë në Xhaminë e Namazgjasë, ku u prit ngrohtësisht nga Imami i xhamisë dhe Myftiu i Tiranës, Gazmend ef. Bilalli.
Pas namazit, Myftiu Bilalli i shoqëroi mysafirët në një vizitë të detajuar brenda kompleksit të Namazgjasë, duke i njohur me historikun e ndërtimit, funksionimin, hapësirat dhe rëndësinë e kësaj xhamie të re monumentale në jetën fetare të Tiranës, transmeton helveticALforum.ch
Takim zyrtar me Myftininë e Tiranës
Në vijim, u zhvillua një takim miqësor dhe institucional mes delegacionit të Xhamisë “Drita” dhe Myftinisë së Tiranës. Kryetari Fadil Asani prezantoi punën, organizimin dhe angazhimin e Xhamisë “Drita” në Zvicër, duke theksuar rolin e saj në jetën fetare dhe komunitare të shqiptarëve atje.
Nga ana tjetër, Myftiu Gazmend ef. Bilalli bëri një pasqyrë të aktiviteteve të Myftinisë së Tiranës, projekteve të saj dhe dinamizmit fetar që po zhvillohet në kryeqytet. Takimi u përmbyll me një drekë të shtruar nga Myftiu në nder të delegacionit, duke rikthyer frymën e mikpritjes tradicionale shqiptare.
Vizitë në Komunitetin Musliman të Shqipërisë
Pas takimit në Myftininë e Tiranës, delegacioni i Xhamisë “Drita” u prit në selinë e Komunitetit Musliman të Shqipërisë nga zv. kryetari dhe drejtori për diasporën, Laurent ef. Luli. Përfaqësuesit e diasporës patën mundësinë të bisedojnë mbi çështjet e bashkëpunimit, projektet e përbashkëta dhe mënyrat e thellimit të lidhjeve institucionale.
Delegacioni zhvilloi gjithashtu një takim të veçantë me Kryetarin e KMSH-së, Haxhi Bujar ef. Spahiu. Gjatë takimit u shkëmbyen falënderime reciproke për bashkëpunimin e vazhdueshëm, për mbështetjen që xhamitë e diasporës japin në zhvillimin e jetës fetare në Shqipëri, si dhe për kontributin e Xhamisë “Drita” në ruajtjen e identitetit fetar dhe kombëtar të shqiptarëve në Zvicër.
Në shenjë respekti dhe vlerësimi, të dy kryetarët shkëmbyen dhurata simbolike.
Udhëtim vëllazëror që forcon lidhjet mes Shqipërisë dhe diasporës
Vizita zyrtare e delegacionit të Xhamisë “Drita” shënon një moment të rëndësishëm në kuadër të aktiviteteve për 30-vjetorin e saj. Përmes takimeve, bashkëpunimeve dhe kontakteve të ngrohta, u dëshmua se miqësia dhe besimi i përbashkët i bashkojnë shqiptarët, kudo që jetojnë.
Programi i vizitës pritet të vijojë në Shkodër, Krujë dhe Elbasan, ku delegacioni do të marrë pjesë në takime të tjera institucionale dhe kulturore, njofton sektori për informim i xhamisë e transmeton helveticALforum.ch
