Festë e Madhe në Cyrih për 28 Nëntorin
Cyrih, Zvicër – Shoqata LAPSH-ALEV “Naim Frashëri” në Zürich po përgatitet të mirëpresë komunitetin shqiptar në një festë madhështore kushtuar 28 Nëntorit, Ditës së Flamurit dhe Pavarësisë së Shqipërisë. Ngjarja do të zhvillohet të shtunën, më 6 dhjetor, në ambientet e Hotel Töss Winterthur, duke filluar nga ora 18:00.
Festimi, i cili organizohet tradicionalisht çdo vit, synon të ruajë e të promovojë kulturën shqiptare ndër brezat e rinj të mërgatës. Programi i këtij viti paralajmëron një atmosferë të gjallë e festive, me recitime, këngë dhe valle të përgatitura nga nxënësit e shkollës shqipe të LAPSH-it në Cyrih. Ky është një prej aktiviteteve më të rëndësishme kulturore të komunitetit, në të cilin fëmijët marrin rolin kryesor duke shfaqur punën dhe përkushtimin e tyre gjatë vitit.
Në pjesën artistike të mbrëmjes do të marrin pjesë edhe dy këngëtarë të mirënjohur të diasporës, Krist Lleshaj dhe Agron Frrokaj, të cilët do të sjellin këngë të traditës shqiptare, duke e bërë programin edhe më të pasur dhe emocional. Moderimin e ngjarjes do ta mbajë Prof.Dr.Dashnim Hebibi, i cili do të udhëheqë programin festues përgjatë gjithë mbrëmjes.
Organizatorët theksojnë se qëllimi i këtij aktiviteti nuk është vetëm festimi, por edhe forcimi i lidhjeve midis shqiptarëve në Zvicër dhe kultivimi i identitetit kombëtar te brezi i ri. “Komuniteti ynë është gjithmonë i bashkuar në ditë të tilla, dhe interesimi për pjesëmarrje ka qenë mjaft i madh,” shprehen përfaqësues të LAPSH-it.
Eventi është i hapur për të gjithë të interesuarit, ndërsa organizatorët ftojnë diasporën shqiptare të marrë pjesë në këtë mbrëmje të veçantë kulturore e kombëtare, transmeton helveticALforum.ch
Më shumë informacion mund të gjendet në faqen zyrtare të shoqatës: www.lapsh-zh.ch
