Përfaqësuesja e Kosovës sonte zhvillon ndeshjen e dytë të muajit tetor, ku takohet me Suedinë.
Dardanët me fillim nga ora 20:45 në stadiumin Nya Ullevi në Goteborg do të përballen me suedezët ku kërkojnë një rezultat pozitiv. Në sfidën e parë të zhvilluar në Prishtinë, Kosova arriti fitore të madhe ndaj Suedisë 2-0.
“Isak, Gyokeres, Elanga…”, Foda thotë se e ka analizuar Suedinë – synon sërish befasi
Përzgjedhësi i Kosovës Franco Foda është në dijeni të nivelit të lartë të Suedisë dhe stilit të tyre agresivë të lojës, ndërsa konfirmoi se do të luajnë sërish me kundërsulme.
“Dardanët” muajin e kaluar mahnitën të gjithë, duke e mposhtur me rezultat 2-0 Suedinë midis “Fadil Vokrri”.
Foda në konferencë për media para ndeshjes së nesërme konfirmoi se plani do të mbetet i njëjtë, por është në dijeni që nuk do të jetë aspak e lehtë shkaku i mënyrës së lojës që luan Suedia.
“Suedia një kundërshtar që luan futboll shumë direkt, kanë shumë kualitet në sulm me emra si Isak, Gyokeres por edhe Elanga. Jemi të vetëdijshëm që na pret një ndeshje e vështirë, një ndeshje me presion shumë të lartë, por pavarësisht presionit që kanë e dimë se do të jetë vështirë për ne”.
“Është ekip që bën presion të lartë dhe ngjitët shumë lartë në fushë, prandaj duhet të luajmë shumë ngushtë në fazën defansive. Kjo ishte çelësi i suksesit në lojën e kaluar, ku fituam përmes një mbrojtje shumë të kujdesshme dhe më pas krijuam kundërsulme. Kështu duhet të luajmë edhe nesër, por duhet të provojmë të bëjmë presion dhe të shtojmë intensitetin në fazën sulmuese”.
Foda nuk u “ankua” në mungesat e Kosovës, ku shtoi se ka lojtarë me kualitet për t’i zëvendësuar të gjithë ata që fatkeqësisht nuk janë të pranishëm.
“Jemi në një grup ku të tre skuadrat po luftojnë për vendin e dytë sepse është një grup shumë i fortë dhe të gjithë kanë gjasa. Sa i përket mungesave fatkeqësisht kemi shtesë si Rexhbecaj (i lënduar) dhe Aliti (shkaku i kartonit), por kemi futbollistë me kualitet që mund t’i zëvendësojmë dhe duhet të shkojmë përpara”.
“Stili i lojës është i qartë, futboll agresiv dhe i drejtpërdrejt. Kërkojnë të vijnë te goli përmes dy sulmuesve të tyre, e njëjta pyetje është se kush do të jetë në sulm. Në përgjithësi mbesin skuadër shumë e fortë dhe konsistente. Kam parë ndeshjet e fundit dhe gjithnjë kanë kërkuar të luajnë kështu, prandaj pres që të luajnë sërish”, nënvizoi tekniku gjerman.