Ilir Pilku, ekspert i lartë i bujqësisë, në emisionin “Mirëmëngjes Shqipëri” deklaroi se Shqipëria në prodhimet e saj konsumon më pak kimikate dhe pesticide se mesatarja e Europës.
Për ekspertin, gabimi që bëjnë fermerët shqiptarë është mosrespektimi i karencës, duke nxjerrë kështu në treg një prodhim me normë të lartë kimikatesh apo pesticidesh.
Pilku bëri thirrje konsumatorit që të ndërgjegjësohet dhe çdo produkt të skaduar ta reklamojë në organe përkatëse.
“Kjo çështje duhet të diskutohet në dy rrashfe, në atë politikbërjes pra si funksionojnë institucionet përkatës dhe roli i konsumatorit. Do ta vendosja theksin tek ky i fundit, sa i ndërgjegjshëm është konsumatori shqiptar që në rast se shikon një produkt të skaduar, ta reklamoje në organet përkatëse.
Në bazë të statistikave, Shqipëria në prodhimet e saj konsumon më pak kimikate se mesatarja e Europës. Pra, afërsisht në një sipërfaqe 1 hektar, ne përdorim rreth 95 kilogram kimikate ndërsa BE e ka 125 kilogram për 1 hektar. Pra është afërsisht 30-40 përqind më shumë se ne. E njëjta gjë është edhe me pesticidet, flasim për 1 hektar ne përdorim 0-6 kilogram deri në 1.1 kilogram, ndërsa në botë është 2.1 deri 2.2 kilogram.
Ne nuk bëjmë mirë ruajtjen dhe respektimin e dozës. Pasi sa ndeshemi me një sëmundje, në vend se të përdorim një dozë të përcaktuar e përdorim me 1.5 herë me idenë që të kryejë rolin sa më shpejt dhe sa më mirë. Nuk respektojnë karencën, pra është e shënuar një afat kohor, zakonisht 10 ditë, që pas hedhjes së preparatit nuk duhet të vjelësh prodhimin”, nënvizoi Pilku.
Sipas tij, kjo ndodhë për faktin që fermeri nuk është i informuar dhe se institucionet përkatëse nuk e kryejnë rolin siç duhet, njofton rtsh.
